နွေ နေ့လယ်ခင်းမှာ ပျင်းရိငြီးငွေ့စရာ ကောင်းလှသည်။ လမ်းမကြီးပေါ်မှာတော့ အပူရောင်တွေ အငွေ့ပျံတက်နေသည်။ သစ်ရွက်တချို့ ကြွေကျနေသည်။ နွားနို့ပုံးတွေ အပြည့်တင်ထားသည့် မြင်းလှည်းတစ်စီး မြောက်ဘက် ရွာသာရပ်ဆီ ဒုန်းစိုင်းပြီး မောင်းသွားသည်။ ကျွန်တော့် စိတ်မှာ သစ်ရွက်ကြွေတွေနှင့် အပူငွေ့တွေကြား စီးမျောသွားသည်။
ဟောသည့် မြို့ကလေးက သည်ကနေ့ပဲ ကျွန်တော် ထွက်ခွာသွားတော့မည်။ အခုထိုင်နေသည့် တောသည် လက်ဖက်ရည်ဆိုင်ကလေး ဆီကိုလည်း နောက်ထပ် ဘယ်အချိန်မှ ပြန်ရောက်လာဦးမလဲ ဆိုတာ မသေချာဘဲနဲ့ပေါ့။ ဈေးအတွင်းမှာ ရှိသည့် ဟောသည့် လက်ဖက်ရည်ဆိုင်ကလေး၏ ဟောသည့် နေရာမှာ ထိုင်ပြီး သည်မြင်ကွင်းတွေ သည်အရောင်တွေကို ကြည့်ကာ သည်မှာ ဆယ်နှစ်ကျော်ပါပြီ။ အခုတော့ ဆယ်နှစ်ကျော်မျှ နေထိုင်ခဲ့သည့် သည်မြို့ကလေးမှ ကျွန်တော် ထွက်ခွာသွားတော့မည်။ ကျွန်တော့် စိတ်တွေ ရီဝေနေသည်။ လွမ်းစရာ ကောင်းနေသလိုလည်း ခံစားနေရပြန်သည်။
တကယ်တော့ သည်မြို့ကလေးမှာ ကျွန်တော့်အတွက် လွမ်းစရာ ဘာအရာမျှ မရှိကြောင်း ကျွန်တော့် နှလုံးသားက ခံစားသိရှိ နေပြန်သည်။ သည်မြို့ကလေးတွင် အထီးကျန် ဆန်ဆန်ပင် ကျွန်တော် နေထိုင်ခဲ့သည်။ ပန်းချီသင်တန်းမှ ဆင်းပြီး မိဘရပ်ထံသို့ မပြန်ဘဲ သည်မှာပင် အိမ်ခန်းကလေး တစ်ခုငှားပြီး နေထိုင်ခဲ့သည်။ ဆယ်နှစ်ကျော်ကာလထိ နေထိုင်ခဲ့သော်လည်း အသိမိတ်ဆွေ သိပ်မရှိခဲ့။ ပန်းချီသင်တန်းမှ ဆင်းပြီး ပန်းချီပညာဖြင့်သာ အသက်မွေးဝမ်းကျောင်း ပြုမည်ဟု စိတ်ကူးခဲ့သော်လည်း လူအများနှင့် ဆက်ဆံရသော စီပွားရေး ပန်းချီလုပ်ငန်းများကို ဟုတ္တိပတ္တိ မလုပ်ဖြစ်ခဲ့။ တစ်ခါတစ်ရံ ကျွန်တော့် စားဝတ်နေရေးအတွက် မလွှဲမရှောင်သာ လုပ်ရသော အခါများတော့ ရှိခဲ့ပါသည်။ များစွာသော နေ့ရက်များ၌ ကျွန်တော်သည် အခြားလူများအတွက် ဘာမျှထူးခြားသူ တစ်ယောက် မဟုတ်ခဲ့သဖြင့် အမြဲတမ်းလိုပင် တစ်ဦးတည်း နေထိုင်ခဲ့ရသည်။ ဘဝ၏ နွေးထွေးမှုတို့ အစား အေးစက် ထုံထိုင်းစွာသော နေ့ရက်တွေကို ကုန်ဆုံးခဲ့ရသည်။ နေ့လယ် နေ့ခင်းများ၌ သည် လက်ဖက်ရည်ဆိုင် ကလေးတွင်သာ တစ်နေကုန် ထိုင်နေတတ်ပြီး ညနေချိန်များတွင် အရက်ဆိုင်သို့ ရောက်သွားတတ်သည်။
သည်မြို့ကလေးသို့ ရောက်ကာစကတော့ ကျွန်တော့်မှာ မိတ်ဆွေ အနည်းငယ် ရခဲ့ဖူးသည်။ ကြာလာသောအခါ ထိုမိတ်ဆွေများနှင့် တဖြည်းဖြည်း စိတ်ချင်းဝေးသွားကြသည်။ ကျွန်တော်နှင့် ထိုလူများ မသင့်မြတ်ကြသောကြောင့်တော့ မဟုတ်။ တစ်ဦးနှင့် တစ်ဦး ဆွဲဆောင်မှု မရှိဘဲ သာမန် ဆက်ဆံမှုအဆင့်မှ တဖြည်းဖြည်း ဝေးသွားကြခြင်းသာ ဖြစ်သည်။ လူ အများနှင့် ထိုသို့ ကြာရှည်စွာ မဆက်ဆံနိုင်ရာတွင် အခြားလူများထက် ကျွန်တော့်တွင် ပိုပြီး ချို့ယွင်းချက် ရှိမည် ထင်ပါသည်။ ကျွန်တော်သည် မည်သည့် အကြောင်းအရာကိုမျှ အခြားသူများ စွဲလမ်း အမှတ်ရအောင် ပြောဆိုနိုင်သူ မဟုတ်။ လူအများမနှစ်သက်သော်လည်း စွဲလမ်းအမှတ်ရ စေနိုင်သည့် ငြင်းခုံပြောဆိုခြင်းမျိုးဖြင့်ပင် ကိုယ့်အယူအဆ တစ်ခုကို ပွင့်ပွင့်လင်းလင်း ပြောရဲသူ မဟုတ်သဖြင့် ကျွန်တော်သည် အခြားလူများအတွက် စိတ်ဝင်စားစရာ မကောင်းလှဘဲ ပျင်းရိ ငြီးငွေ့စရာလူ တစ် ယောက်သာ ဖြစ်နေတတ်သည်။
ထိုသို့ လူအများနှင့် ကြာရှည်စွာ မိတ်ဆွေ ဖြစ်နိုင်စွမ်း မရှိသော ကျွန်တော့်အတွက် အလွန်ကံဆိုးလှသူ တစ်ဦးနှင့်တော့ အတော်ကြာ မိတ်ဆွေအဖြစ် နေထိုင်ခဲ့ကြဖူးပါသည်။ ထိုမိတ်ဆွေ၏ ကံဆိုးမှုမှာ အိမ်ထောင်ရေး ကိစ္စ၌ ဖြစ်သည်။ သူသည် ခေတ်ပညာကို အတော်အတန် သင်ယူခဲ့ဖူးပြီး သည်မြို့ကလေးမှ ပိုက်ဆံချမ်းသာသော သူဌေးတစ်ဦး၏ သမီးနှင့် အိမ်ထောင်ကျခဲ့သည်။ သူ့ယောက္ခမများ၏ စီးပွားရေး လုပ်ငန်းတွင် လုပ်ကိုင်နေရပြီး သူ့မိန်းမ၏ ဩဇာလွှမ်းမိုးခြင်းကို ခံနေရသည်။ နေ့စဉ် စိတ်မချမ်းသာမှု၊ မပျော်ရွင်မှုများဖြင့် သူ့ရုပ်ရည်မှာ သူ့အသက်ထက် ဆယ်နှစ်ခန့်မျှ အိုစာနေတော့သည်။ သူ၏ ရွေးချယ်မှု မှားယွင်းခဲ့ခြင်းအတွက် သူနောင်တ ရနေပုံမှာ နှစ်ပေါင်းများစွာ ထွန်ယက်ခဲ့ရသည့် နွားအိုကြီး တစ်ကောင်ကို သွားပြီး သတိရစေတော့သည်။
“သူ့ တိုက်တွေ၊ ကားတွေ၊ သူ့မှာ ရှိသမျှ စည်းစိမ်ဥစ္စာတွေ အားလုံးကို ကျွန်တော် ပိုင်တယ်လို့ ပြောနိုင်ပါရဲ့၊ ဒါပေမယ့် ... သူ့ပစ္စည်း ဥစ္စာတွေ အားလုံးကို ပိုင်တဲ့ ကျွန်တော့်ကိုတော့ သူက ပိုင်ပြန်ရောဗျ” ဟု ပြောတတ်သည်။
“ကျုပ်မှာ တကယ်တာမ်း ချစ်ရတဲ့ မိန်းကလေးတစ်ယောက် ရှိခဲ့တယ်ဗျ” ဟူ၍ သူ့ဇာတ်လမ်းကို အစချီကာ တအီအီ ငိုကြွေးတော့သည်။
“အင်း ... ကျုပ်ဟာ ကလေးနှစ်ယောက် အဖေ ဖြစ်ခဲ့ပြီး တစ်နေ့ထက် တစ်နေ့ ရင့်ကျက်ခဲ့ပါပြီဗျာ၊ ရင့်ကျက်တယ်ဆိုရင် ဘာဖြစ်လို့ ငိုနေရတာလဲ၊ ဘာဖြစ်လို့ မျက်ရည်တွေ ကျနေရတာလဲလို့ မေးကြလိမ့်မယ်။ ရင့်ကျက်တယ်ဆိုတဲ့ အဓိပ္ပါယ်ထဲမှာ မျက်ရည်တွေ၊ ငိုကြွေးခြင်းတွေ မပါဘူးလို့ ခင်ဗျားတို့က ယူဆကြတာကိုး ...” ဟု သူ့ဟာသူ ပြောပြီး ငိုပြန်တော့သည်။
ထိုမိတ်ဆွေ သေဆုံးသွားသော နေ့က သူ့အသုဘကို ကျွန်တော် လိုက်မပို့ဖြစ်ခဲ့။ အခြား တစ်နေရာသို့ ခရီးသွားနေခိုက် ဖြစ်သည်။
သူ့အကြောင်း ပြန်တွေးရင်း အပူငွေ့တွေနှင့် တုန်ခါနေသည့် လမ်းမကြီးဆီ ကျွန်တော် ငေးမျှော်မိပြန်သည်။ ဆယ်နှစ်ကျော် ကာလအတွင်း သည် လက်ဖက်ရည်ဆိုင်လေးမှာ နေ့တိုင်းလိုလိုပင် ကျွန်တော် ထိုင်ဖြစ်ခဲ့သည်။ သည်နေ့ရက်တွေ အားလုံး ကျွန်တော့်အတွက် တစ်စုံတစ်ရာ အမှတ်ရစရာ ဘာများ ရှိခဲ့ပါသလဲ။ တစ်စုံတစ်ယောက်နှင့် အမှတ်ရစရာ ဘာစကားတွေ ပြောဖြစ်ခဲ့ပါသလဲ။ ကျွန်တော့်အတွက် ဘာမျှ ထူးခြားမှု မရှိခဲ့ပါ။ တစ်ခါတစ်ရံမှာ ပူပြင်းသော နေရောင်အောက်တွင် အကြောင်းမရှိလျက်ဘဲ စိတ်ဓါတ်တွေ တက်ကြွနေခဲ့ဖူးသည်။ တစ်ခါတစ်ရံမှာတော့ အဆုံးစွန်ထိ ပျင်းရိငြီးငွေ့နေခဲ့ဖူးသည်။ သည်မြို့ကလေးမှ အခြားလူများလို ကျွန်တော်သည် စစ်တုရင်ထိုးဖို့လည်း ဝါသနာ မပါခဲ့။ သောလုံးပွဲ အကြောင်း၊ တရားဓမ္မ အကြောင်း၊ ရုပ်ရှင် မင်းသား မင်းသမီး အကြောင်း၊ အဆိုတော်များ အကြောင်းကိုလည်း မပြောတတ်ခဲ့။ တစ်ယောက်တည်းပင် ရုပ်ရှင် သွားကြည့်နေတတ်ခဲ့သည်။ စာအုပ်တစ်အုပ် ထိုင်ဖတ်နေဖြစ်ခဲ့သည်။ သည် မြို့ကလေးတွင် သည် လက်ဖက်ရည်ဆိုင်သည် လူအများဆုံး သောက်သော ဆိုင်ကလေး ဖြစ်သည်။ နံနက်လင်းချိန်မှ ကိုးနာရီ၊ ကိုးနာရီခွဲထိ လူတအား စည်ကားသည်။ လက်ဖက်ရည် သောက်ပြီးမှ ကိုယ့်လုပ်ငန်းခွင် အသီးသီးသို့ သွားကြသည်။ အများစုမှာ ရုံးသူ ရုံးသားများ၊ ပန်းထိမ် ဆရာများ၊ မော်တော်ကား စက်ပြင်နှင့် တွင်ခုံ အလုပ်သမားများ၊ မွေးမြူသူများ၊ နွားနို့ညှစ်သူများ စသည်ဖြင့် လုပ်ငန်းစုံလှသည်။
သည်မြို့ကလေးမှ လူငယ်အများစုမှာ စိတ်အားတက်ကြွ ပျော်ရွှင်တတ်ကြသူများ ဖြစ်သည်။ ကျွန်တော်နှင့် ခင်မင်ရင်းနှီးမှု သိပ်မရှိလှသော်လည်း သူတို့မျက်နှာမှာ ဖော်ရွေမှု အပြည့် ရှိနေတတ်ကြသည်။ ခင်မင်နှစ်သက်စရာ ကောင်းလှသည်။ မိန်းကလေး အများစုမှာ ဆေးလိပ်ခုံ လုပ်ငန်း၊ အချိတ်ထဘီ ရက်လုပ်သည့် လုပ်ငန်း၊ စက်ချုပ်လုပ်ငန်း စသည့်တို့ကို လုပ်ကိုင်ကြသည်။ ပညာတတ်များ၊ တက္ကသိုလ် ကျောင်းသူများ၊ ရုံးဝန်ထမ်းများလည်း ရှိပါသည်။ အများစုမှာ ရုပ်အဆင်းသွင်ပြင် တင့်တယ်ပြီး အသားအရည် စိုပြည်ကြသည်။ လူကြီးပိုင်းတွင် နိုင်ငံရေးသမားဟောင်း ကြီးများ၊ အစဉ်အလာ ချမ်းသာကြွယ်ဝသူများ ပေါများသည်။ တရားဓမ္မ လိုက်စား ဆွေးနွေးမှုကို ခုံမင်ကြသည်။ အများစုမှာ ကိုယ်ပိုင်လုပ်ငန်းကို လုပ်ကိုင်ကြပြီး လှုကြီးလူကောင်းဆန်ဆန် ပြောဆို နေထိုင်မှုကို ဂုဏ်ယူ တတ်ကြသည်။
ကျွန်တော့် ဗီဇကိုက ထုံထုံထိုင်းထိုင်း နေတတ်သူတစ်ယောက် ဖြစ်သည့်အတွက် သည်မြို့ကလေးမှ လူကြီး လူကောင်းများ၊ ခင်မင်စရာ ကောင်းလှသည့် လူငယ်များ၊ လှပချောမောသည့် မိန်းကလေးများနှင့် မိတ်ဆွေ ဖြစ်မှု မရှိခဲ့ရသော်လည်း သည် လက်ဖက်ရည်ဆိုင်ကလေးတွင် ဆယ်နှစ်ဆယ်မိုး နေ့စဉ်လို လာရောက်နေထိုင်ခဲ့သည့်အတွက် ကျွန်တော့် နှလုံးသား၌ အမှတ်တရ ရှိနေ ရသော လူတချို့တော့ ရှိပါသည်။ ထိုလူများမှာ သည်မြို့ကလေးက အခြားလူများနှင့်တော့ ကွဲပြားခြားနားလှသည်။ ကျွန်တော် ဖော်ပြခဲ့သည့် အိမ်ထောင်ရေးတွင် ကံဆိုးလွန်းလှသူ ကဲ့သို့ပင် သူတို့၏ ဝိညာဉ်မှာ ထာဝစဉ် နာကြည်းကြေကွဲနေကြသူများ ဖြစ်လိမ့်မည်။
သူတို့အထဲမှာ ပထမဆုံး ပြောလိုသူမှာ အဆွေးသမား တစ်ယောက် ဖြစ်သည်။ သူ့နာမည်ကိုတော့ “ကိုဆွေးမောင်” ဟုသာ ခေါ်ကြပါစို့။ သူ့ မျက်နှာမှာ အမြဲတမ်းပင် ပူဆွေးသောက ရောက်နေသည့် အသွင်ကို ဆောင်လျက်ရှိသည်။ သူသည် တစ်ယောက်တည်းသာ အဆွေးများဖြင့် ငေးမောရင်း ထိုင်နေတတ်သည်။ ဤသို့ တစ်ယောက်တည်း ထိုင်နေခြင်းဖြင့် သူ့ ဦးနှောက်ထဲသို့ စိတ်ကူးစိတ်သန်း အသစ်အဆန်းများ ဝင်ရောက်လိမ့်မည်ဟု သူ ယုံကြည်ထားကြောင်း ပြောပြလေ့ရှိသည်။ သို့ရာတွင် သူသည် ဘဝတစ်လျှောက်လုံး၌ ဘာအရာကိုမျှ မည်မည်ရရ လုပ်ကိုင်ဆောင်ရွက် ခဲ့ဖူးသူ မဟုတ်။ ဤမြို့ကလေးတွင် မွေးဖွားကြီးပြင်းခဲ့ပြီး ဤမြို့ကလေး၌ပင် အရိုးထုတ်ရန် ကြံရွယ်ထားဟန် တူသည်။ သူ့မိဘများ ရှိစဉ်က အတော်အတန် ချမ်းသာကြွယ်ဝခဲ့သော်လည်း၊ ယခု ထို စည်းစိမ်ဥစ္စာများ မရှိတော့ပေ။
သူ့ ဦးနှောက်ထဲသို့ အလိုအလျောက် ဝင်ရောက်လာလိမ့်မည်ဟု သူ ယုံကြည်ထားသော စိတ်ကူးစိတ်သန်းများမှာလည်း သူ့ဘဝ ဖြတ်သန်းမှု၏ သေးမွှားသော အစိတ်အပိုင်းများထဲမှ တိုးထွက်လာခဲ့ခြင်းမျှသာ ဖြစ်ပြီး မရေရာသော နောင်တတရားနှင့် သံဝေဂဆန်ဆန် အတွေးများသာဖြစ်သည်။ သံဝေဂဆိုသည်မှာ အဘယ်နည်း၊ သစ်ပင် တစ်ပင်ထက်တွင် အခက်အလက် ဝေဆာနေခြင်းမှ ပူပြင်းသော နွေရာသီ၌ အလိုလျောက် ကြွေကျခဲ့ရသည့် သဘောထာရားထက် မည်သို့မျှ ပိုမိုမလေးနက်သော အလိုအလျောက် ကုန်ဆုံးခဲ့ရသော သူ့ဘဝ၏ အစိတ်အပိုင်းများကို ပြန်လည် တမ်းတခြင်းမျှသာ ဖြစ်သည်။
နောင်တ ဆိုသည်မှာလည်း ထို့အတူပင်။ သူ့ဘဝ၌ မဖြစ်ခဲ့ရသမျှတို့ကို ပြန်လည်တမ်းတခြင်းမျှသာ ဖြစ်သည်။ သို့ရာတွင် သူ့ဘဝ၌ တကယ်တမ်း ဖြစ်ချင်ခဲ့သောအရာမှာ ဘာဖြစ်သည်ဟူ၍ သူကိုယ်တိုင် မသိပြန်။ ဤသို့ဖြင့် ခါးသီးသော ဘဝအတွေ့အကြုံ တစ်ခုမျှ မပါဘဲလျက် အလိုအလျောက် ကြေကွဲနေသော နောင်တနှင့် သံဝေဂတရားတို့ကို မျက်မှောက်ပြုနေရသော သနားစရာ ဘဝတစ်ခုကို သူပိုင်ဆိုင်နေတော့သည်။ သူ့မျက်နှာမှာ ထာဝစဉ်ပင် အနက်အဓိပ္ပါယ် ဖွင့်ဖို့ခက်သည့် အသွင်ကို ဆောင်လျှက် အမြဲတမ်းလိုပင် တိတ်ဆိတ်စွာ ထိုင်နေတတ်ရာ ညပေါင်း များစွာ၌ သူ့ဝိညာဉ်မှာ ည၏မှောင်မိုက်ခြင်းထဲသို့ တရွေ့ရွေ့ တိုးဝင်နေပြီး နေ့ပေါင်းများစွာ၌ သူ့ဝိညာဉ်မှာ ကျယ်ပြန့်သော အလင်းရောင်ထဲသို့ ထွက်ပြေးနေသလား အောက်မေ့ရတော့သည်။ သူသည် ပန်းနာရင်ကျပ် ရောဂါကိုလည်း နှစ်ပေါင်းများစွာ ခံစားနေရသူဖြစ်ရာ သူ့လည်ချောင်းထဲမှ သလိပ်များကို ခက်ခဲစွာမျိုချနေပုံမှာ ကမ္ဘာကြီးတစ်ခုလုံးအား မျိုချနေရ သကဲ့သို့ရှိပြီး ကြည့်ရသည်မှာ ရင်မောစရာ ကောင်းလွန်းလှတော့သည်။
ကျွန်တော်သည်လည်း ကိုဆွေးမောင်ကဲ့သို့ပင် လမ်းမပေါ်မှ အပူရောင်များကို အဓိပ္ပါယ်လုံးဝ မရှိဘဲနှင့် အဓိပ္ပါယ်တစ်ခုခု ရှိလေဟန် ငေးကြည့်နေတတ်ခဲ့သည်။ သည်ဆိုင်ကလေးတွင် ကက်ဆက်ခွေဖွင့်ခြင်း လုံးဝမရှိ။ သို့ရာတွင် တစ်ဦးနှင့်တစ်ဦး နောက်ပြောင်ရယ်မောကြသံ၊ စားပွဲထိုးလေးများ အချင်းချင်း မှာကြားသံ၊ ဆိုင်ပိုင်ရှင်ဖြစ်သူ ကိုအောင်စိုး၏ စေခိုင်းသံတို့ဖြင့် အမြဲတမ်းလို ဆူညံ နေတတ်သည်။ ဆိုင်ကလေးမှာ သူတို့ ဖခင်ကြီး အဆင်းရဲ၊ အပင်ပန်းခံကာ စတင်ပျိုးထောင်ခဲ့ခြင်း ဖြစ်ပြီး ယခု ကိုအောင်စိုးနှင့် ညီအစ်ကိုတစ်တွေက ဦးစီးလုပ်ကိုင်နေကြသည်။ သည်လက်ဖက်ရည် လုပ်ငန်းဖြင့်ပင် သည်မြို့လေး၌ ထိပ်သီး ချမ်းသာကြွယ်ဝသူများ စာရင်းဝင်လျက် ရှိပြီ။ ကျွန်တော်ပင် ဟိုတစ်ခါတုန်းက ငွေတစ်ဆယ်လိုသဖြင့် “မဃဒေဝ လင်္ကာသစ်” စာအုပ် ကိုအောင်စိုးဆီ ရောင်းဖူးသည်။ ကိုအောင်စိုးက စာအုပ်ကို ယူမထားဘဲ ငွေတစ်ဆယ် ချေးလိုက်သည်။
တစ်ခါတစ်ရံတွင် အခြားစားပွဲတစ်ခုခု၌ တက္ကသိုလ်မှ ခေတ္တပြန်ရောက်လာတတ်သော ကျောင်းသားကလေး တစ်ဦးဦးနှင့် လူအချို့ စကား ပြောနေတတ်သည်။ ထိုကျောင်းသားကလေးမှာ သူ့အတွေ့အကြုံကို ပြောမကုန်အောင် ရှိနေတတ်သည်။ သူတို့ကို ကြည့်ပြီး လွန်ခဲ့သော ခေတ်များမှ မျိုးဆက်များကို မတွေ့ကြုံဘူးပဲလျက်နှင့်ပင် ကျွန်တော် မြင်ယောင် နေမိတတ်သည်။ လက်ဖက်ရည်ဆိုင်၌ သူ ပေါ်ပြူလာဖြစ်နေပုံမှာ ကျွန်တော် ဖတ်ဖူးသော ဝတ္ထုတစ်ပုဒ်ထဲတွင် ဘုရင့်တပ်မတော်မှ မိမိဇာတိရပ်ရွာသို့ ခေတ္တပြန်ရောက်လာသော စစ်သားကလေးနှင့်လည်း တူလှသည်။
အခုတော့ နေ့လယ်ခင်းမို့လား မသိ၊ လက်ဖက်ရည်ဆိုင်တွင် လူရှင်းလှသည်။ ကျွန်တော့်အတွက် အထူးတလည် နှုတ်ဆက်စကားပြောရန် မိတ်ဆွေဟူ၍ မရှိသော်လည်း ကျွန်တော် မြင်တွေ့နေကျ လူများကိုတော့ မြင်လိုလှပါသည်။ သူတို့ကိုပင် ကျွန်တော့် နှလုံးသားအတွင်းမှာ တိုးတိတ်စွာ နှုတ်ဆက် ထွက်ခွာသွားရတော့မည်။
ကိုကျောက်ခဲလည်း ဘယ်ရောက်နေမည် မသိ။ ယခုထိ ရောက်မလာသေးပေ။ ကိုကျောက်ခဲမှာ သည်မြို့ကလေး၌ ကျွန်တော်၏ အရင်းနှီးဆုံး မိတ်ဆွေဟူ၍ ပြောမည်ဆိုက ပြောလို့ရသည်။ ကျွန်တော် တစ်ယောက်တည်း ထိုင်နေသည့် နေရာသို့လာပြီး “အစ်ကို စားပြီးပြီလား” ဟု သူက မေးလိုက်မည်၊ ကျွန်တော်က သူ့ကို အပြားငါးဆယ်၊ သို့မဟုတ် အကြွေ မပါခဲ့လျှင် ကျပ်တန်တစ်ရွက် ပေးလိုက်မည်။ ပိုက်ဆံယူပြီး ထွက်သွားမည်။ ဘာမျှ ထူးထူးထွေထွေ ပြောနေမည် မဟုတ်။ လက်ဖက်ရည်ဆိုင်သို့ လာမည်ဆိုလျှင် ကျွန်တော့်အတွက် လက်ဖက်ရည်နှင့် ဆေးလိပ်ဖိုးအပြင် ကိုကျောက်ခဲအတွက် အပြားငါးဆယ် အရံသင့် ယူဆောင်လာခဲ့ရသည်။ တစ်ခါတစ်ရံ ကျွန်တော်တွင် သူ့အတွက် ပိုက်ဆံမပါသောအခါ အားနာစွာနှင့် “မနက်ဖြန်မှ ယူနော်” ဟု သူ့ကို ပြောရသည်။ ထိုအခါမျိုးတွင် သူသည် မြူဝေ့ဆိုင်းသော မျက်လုံးအစုံဖြင့် ကျွန်တော့်အနီးမှာ ရပ်ပြီး ပတ်ဝန်းကျင်ကို ငေးမျှော် ကြည့်နေတတ်သည်။ သိပ်ကြာအောင် ရပ်နေသောအခါများမှာတော့ ကျွန်တော်လည်း ရှက်လာတတ်သည်။ ပတ်ဝန်ကျေင် စားပွဲများမှ လူတွေက ကျွန်တော်တို့ နှစ်ဦစေလုံးကို ကြည့်နေကြမည်။ ကိုကျောက်ခဲ အလွယ်တကူ ထွက်မသွားခြင်းမှာ ကျွန်တော့်ထံမှ ပိုက်ဆံ မရသောကြောင့် ဖြစ်ကြောင်းသိကြမည်။ ကျွန်တော့်တွင် အပြားငါးဆယ်ပင် အပိုမပါကြောင်း လူတွေသိကြမည်။ မည်သို့ပင်ဖြစ်စေ ကိုကျောက်ခဲမှာ ကျွန်တော့်အားများစွာ စိတ်အနှောင့်အယှက် ဖြစ်စေသည်တော့မဟုတ်ပါ။
ကိုကျောက်ခဲ ဝတ်ထားသည့်အင်္ကျီမှာ ကားပြင် ဝပ်ရှော့သမားများက ဝတ်ထားသည့် အင်္ကျီထက်ပင် ချေးတွေ ပေကျံနေသည်။ နောက် ကျောပြင်တစ်ပြင်လုံး ဟာလာဟင်းလင်း ဖြစ်သည် ။ လုံချည်မှာ သည့်ထက်ပိုပြီး ညစ်ပတ်ပေကျံ နေသေးသည်။ နဖူးပြောင်ပြီး နောက်ပိုင်းမှ ဆံပင်များက တွန့်လိမ်ကွေးကောက် ရှုပ်ထွေးနေသည်။ မုတ်ဆိတ်မွေး၊ ပါးမြိုင်းမွေး ထူလပျစ်နှင့်ဖြစ်သည်။ တစ်ခါက ကျွန်တော်နှင့် သိကျွမ်းဖူးသော စာပေသမားတစ်ယောက် သူ့ လွယ်အိတ်ထဲ အမြဲဆောင်ထားတတ်သည့် စာအုပ်ထဲက “ဒေါ့တော်ယက်စကီး” ဆိုသူနှင့် အလွန်တူလှသည်။ ထိုစာပေသမားမှာလည်း သူ့လွယ်အိတ်ထဲကာ ဒေါ့တော်ယက်စကီး အတိုင်းပင် ဖြစ်ပြီး “ခင်ဗျားနဲ့ ဒေါ့တော်ယက်စကီးနဲ့ တော်တော့ကို တူတယ်ဗျာ” ဟု သူက ကျွန်တော့်ကို ပြောခိုက်တွင် ကျွန်တော်ကတော့ သူနှင့် ကိုကျောက်ခဲတို့ တူညီပုံကို စဉ်းစားနေမိတတ်သည်။ “မြေအောက် မှတ်တမ်းများ” ဆိုသည့် စာအုပ်ထဲက စာပိုဒ်များကို သူက ကျွန်တော့်အား ရွတ်ပြခဲ့ဖူးသည်။
ကိုကျောက်ခဲကဲ့သို့ပင် ကျွန်တော့်အတွက် အခြားမိတ်ဆွေတစ်ဦး ရှိသေးသည်။ သူ့အမည်မှန်ကို ကျွန်တော် မသိသော်လည်း သူ့ကို ကျွန်တော်က “ဌေးရဲ့ ချစ်သူ” ဟု ခေါ်ပါသည်။ အခြားစားပွဲများက သူလာရောက်ထိုင်ခြင်းကို အသိအမှတ် မပြုကြသဖြင့် ကျွန်တော့်နားတွင် အမြဲလာရောက် ထိုင်တတ်သည်။ သူ့နဖူးတွင် “ဌေးဌေး” ဟု ဆေးမင်ဖြင့် စာတန်း ထိုးထားသည်။ လက်ဖမိုး နှစ်ခုလုံးပေါ်တွင်လည်း “ဌေးဌေးရေ” ဟု ရေးထားသည်။ သူ၏ ထူးခြားသော အရည်အချင်းမှာ စကား အဆက်အစပ် လုံးဝမရှိဘဲနှင့်ပင် “မငိုပါနဲ့ဗျာ ... မငိုပါနဲ့၊ စိတ်ကို ထိန်းထားမှပေါ့” ဟု တစ်စုံတစ်ယောက်က ပြောလိုက်လျှင် သူ့မျက်လုံးနှစ်ဖက်မှ မျက်ရည်များ ဒလဟော စီးကျလာနိုင်ခြင်းပင် ဖြစ်သည်။
လက်ဖက်ရည်ဆိုင်မှ စီးကရက်ဘူးခွံများကို တောင်းပြီး “ချစ်သော ဌေးရေ၊ ဒီနေ့အမီ ငွေငါးဆယ် ပို့လိုက်မည်။ ကလေးတွေကော နေကောင်းတယ် မဟုတ်လား။ အချစ်များစွာဖြင့် ... ကိုကို” ဟူသော စာကြောင်းများကို ကျွန်တော်က သူ့အတွက် ရေးပေးရတတ်သည် ။ ထိုစာကို မည့်သည့်အရပ်သို့ ပို့သည်ဟု ကျွန်တော်မသိပေ။
ကျွန်တော်နှင့် သိပ်မရင်းနှီးလှသော်လည်း မြို့လူထုက ပြောစမှတ် ပြုကြသည့် ကျောင်းဆရာလေး တစ်ဦးအကြောင်း ရှိသေးသည်။ ကျောင်းဆရာလေးသည် ဤမြို့ကလေးမှ အတန်ဝေးသည့် တောရွာတစ်ရွာသို့ သွားပြီး စာသင်ရသည်။ သူ့အား ပြောစမှတ် တွင်စေသည့် အကြောင်းမှာ ငွေစုခြင်း၌သာ ဝါသနာပါခြင်း ဖြစ်သည်။ သူငွေစုခြင်းမှာ စုဆောင်းထားသောငွေဖြင့် အမြတ်အစွန်းရအောင် ပြုလုပ်လိုသောကြောင့် မဟုတ်။ သူသည် ကျောင်းဆရာ အလုပ်မှလွဲပြီး ဘာကိုမျှ မလုပ်တတ်၊ ငွေစုခြင်းမှာ သူ့ဝါသနာနှင့် သူ့နောင်ရေးအတွက် စိုးရိမ်ပူပန်မှုကြောင့်သာ ဖြစ်သည်။
အခြားလူများ စာဖတ်ရန်၊ ဘောလုံးပွဲကြည့်ရန်၊ ရုပ်ရှင်ကြည့်ရန် ဝါသနာပါနည်းမျိုးလို သူသည် ငွေစုရန် ဝါသနာပါခြင်း ဖြစ်သည်။ မိမိ စိုက်ထားသော သစ်ပင်အား အမြစ်ထွက်မထွက် တစ်နေ့တစ်ခါ ဖော်ကြည့်သော မျောက်ကဲ့သို့ ကျောင်းဆရာလေးသည်လည်း လူခြေတိတ်သော ညအခါများ၌ သူစုထားသော ငွေများကို ညစဉ် ရေတွက်နေတတ်သည်ဟု မြို့လူထုက ပြောစမှတ် ပြုကြသည်။ စနေ၊ တနင်္ဂနွေလို ကျောင်းအားရက် အိမ်ပြန်လာသောအခါ ယခင်ညနေက ချက်ပြီး မကုန်ဘဲ ကျန်နေသော ထမင်းကြမ်းများကို ထုတ်ယူလာတတ်သည်။ ဤနည်းဖြင့် သူ့အတွက် ထမင်းတစ်နပ် အလဟဿ မဖြစ်စေဘဲ သူ၏ စုဘူးထဲသို့ ငွေအရေအတွက် တိုးစေသည်။
လူတို့အကြောင်းများကို စဉ်းစားရင်း နေတောင် အတော်ချိုသွားပြီ။ ညနေ လေးနာရီလောက်ပင် ရှိရော့မည်။ ဟော အခြားစားပွဲ တစ်ခုတွင် တရားဓမ္မလိုက်စား ဆွေးနွေးသူများ ရောက်နေကြပြီး သူတို့ထဲတွင် အတော်အသက်ကြီးသူများ ပါသလို လူရွယ်များလည်း ပါသည်။ သူတို့သည် တရားဓမ္မအား ခေတ်သစ်နည်းဖြင့် လိုက်စားပြောဆိုခြင်းဖြင့် သူတို့ ကိုယ်တိုင်လည်း ခေတ်မီသော အတွေးအခေါ်ရှိသူများ အဖြစ်ခံယူထားကြသူများ ဖြစ်သည်။ သိပ္ပံနည်းကျပြီး စစ်မှန်သော တရားဓမ္မ လိုက်စားသူများအဖြစ် ဂုဏ်ယူ ပြောဆိုတတ်ကြသည်။ အခြားရိုးရာ ဘာသာရေး အမြင်ရှိသူများ၏ အယူအဆများကို ပြက်ရယ် ပြုတတ်ကြသည်။
မျက်နှာထူထူ၊ ခပ်ပုပု၊ မျက်မှန်တပ်ထားသည့် ပုဂ္ဂိုလ်ကြီးက ပါဠိတော်မှ စာပိုဒ်များကို အာဂုံရွတ်ဖတ်နေသည်။ အသက်ခြောက်ဆယ်ကျော် ရှိ အဘိုးအိုက သူ့အတွေ့အကြုံများကို ထုတ်ပြပုံဆောင်ပြီး တရားသဘောကို လောက၏ ဖြစ်ပျက်တတ်သော အခြင်းအရာတို့နှင့် ယှဉ်ပြီး ဝေဖန်ပြနေကြသည်။ လေးဆယ်ရွယ် လူတစ်ဦးက ပါဠိစကားလုံးများကို အင်္ဂလိပ်လို ပြန်ဆိုရွတ်ပြနေသည်။ အခြား လုံးဝပြောဆိုခွင့်မရသူ နှစ်ဦးမှာ ထိုလူများ ရွတ်ဖတ်နေသည်ကို မိမိတို့ နားလည်ကြောင်း ပြသနိုင်ရန် ခေါင်းတဆတ်ဆတ် ညိတ်နေရသည်။
လက်ဖက်ရည်ဆိုင်ထဲမှ ကျွန်တော် ထခဲ့သည်။ ဘူတာရုံကို သွားဖို့လည်း အချိန်စောလွန်းသေးသည်။ မြို့အရှေ့ဖျားဆီသို့ လမ်းမကြီးအတိုင်း လျှောက်ခဲ့သည်။ အရက်ဖြူဆိုင်ထဲဝင်ပြီး အရက် အနည်းငယ် သောက်ခဲ့သည်။ မြို့အရှေ့ဖျား ရေမြောင်းဆီ လမ်းဆက်လျှောက်ခဲ့သည်။ ဟိုအရှေ့ဘက်မှာ တောင်တန်းကြီးတွေက မှိုင်းပျမှုန်ရီလို့။ မြို့မြောက်ဘက်မှာရှိသည့် တောင်တော်မြတ်ဆီက ဘုရားပုထိုးတွေ ဖြူဖြူဖွေးဖွေးနှင့်။ လမ်းမ တစ်လျှောက်မှာတော့ အဝေးတောင်ပေါ် မြို့တွေက ဆင်းလာသည့် ကုန်ကားကြီးတွေ မောင်းနှင်သွားကြသည်။ ညနေ နေချိုသမ်းချိန်မို့ တဖြည်းဖြည်း လူစည်ကားလာပြီ။ ညနေ ကိုးနာရီကျော်သည်ထိ စည်ကားနေဦးမည်။ နေဝင်ဖျိုးဖျ ညနေဆည်းဆာ အောက်တွင် ဆယ်နှစ်ကျော်မျှ ကျွန်တော် နေထိုင်ခဲ့သည့် မြို့ကလေးမှာ ကျွန်တော့်အတွက် သူစိမ်းဆန် လွန်းလှပါဘိ။
အို ... ဘာကို ကျွန်တော် လွမ်းနေမိပါလိမ့်။ ဤမျှ အချိန်ကြာမြင့်စွာ ထွက်ခွာသွားတော့မည့် သည်လိုအချိန်တွင် လှိုက်လှိုက်လှဲလှဲ နှုတ်ဆက်စရာ မိတ်ဆွေ တစ်ဦးတလေတော့ ရှိသင့်သည်ဟု တွေးမိသဖြင့် ရင်ထဲတွင် ဝမ်းနည်းမှုကို ခံစားလိုက်ရသည်။
သည်မြို့ကလေး၌ ကျွန်တော် မရှိတော့ခြင်းကို လှိုက်လှိုက်လှဲလှဲ ဝမ်းနည်းကျန်ရစ်မည့် တစ်စုံတစ်ယောက်အတွက် လှိုက်လှဲ ပူနွေးသော ဝမ်းနည်းမှုမျိုးကို ခံစားလိုက်ချင်သည်။ ခင်မင်ရင်းနှီးသော မိတ်ဆွေ တစ်ဦးဦး၊ ချစ်သူရည်းစား တစ်ယောက်ယောက်၊ ကြည်ညိုလေးမြတ်ရမည့် ပုဂ္ဂိုလ် တစ်ဦးဦး၊ မိဖလို တွယ်တာရမည့် အဘိုးအို တစ်ယောက်၊ ချစ်ရဖွယ် ကလေးငယ် တစ်ဦးဦး စသည်ဖြင့်ပေါ့လေ။ အထီးကျန်ဘဝ၌ ဝမ်းနည်း စရာမရှိသည့်အတွက် ဝမ်းနည်းရသည့် ဝေဒနာမှာ ဝမ်းနည်းစရာရှိပြီး ဝမ်းနည်းရသည့် အဖြစ်ထက်ပင် ပို၍ဝမ်းနည်းဖို့ ကောင်းလှတော့သည်။
ကိုကျောက်ခဲ၊ ကိုဆွေးမောင်၊ ဌေးရဲ့ ချစ်သူ၊ သေဆုံးသွားပြီ ဖြစ်တဲ့ ကံဆိုးလွန်းလှသူ ကျွန်တော့်မိတ်ဆွေ စတဲ့ စတဲ့။ ကျွန်တော်သည် ထိန်းချုပ်မှုမဲ့ ကွဲအက်နေသော ဝိညာဉ်များနှင့်သာ ထိတွေ့ဆက်ဆံခဲ့ရပြီး ဤသူများသည်လည်း ကျွန်တော်ကဲ့သို့ပင် လွင့်စဉ် ဖွာကြဲနေသော သူတို့ ဘဝနှင့် လျော်ညီစွာ ဥပေက္ခာ ဆန်လွန်းကြသည်။ သူတို့ကိုပင် ကျွန်တော့် နှလုံးအိမ်မှ တိုးတိတ်သော စကားသံများဖြင့် နှုတ်ဆက်ခဲ့ရတော့မည်။ သူတို့ကိုပင် သည်ကနေ့ မတွေ့ရသေး။ ကိုဆွေးမောင်ကတော့ သူ့အိမ်မှာ ပန်းနာရင်ကျပ် ရောဂါထနေလိမ့်မယ် ထင်တယ်။ ဌေးရဲ့ ချစ်သူကတော့ တောအရက်ဆိုင် တစ်ဆိုင်ဆိုင်မှာ ရှိလိမ့်မည်။ သူသည် နေ့ရော ညပါ အရက်သောက်သူ ဖြစ်သည်။ ကိုကျောက်ခဲကတော့ အရက်မသောက်တတ်၊ လမ်းမပေါ်တွင် လျှောက်သွားနေမည်လား၊ လက်တစ်ဖက်က ဓါးကိုထောက်ပြီး မြူဝေ့ဆိုင်းသော မျက်လုံးအစုံဖြင့် တစ်နေရာရာမှ ရပ်ပြီး တစ်နေရာရာဆီ ငေးကြည့်နေမည်လား။ ရေပုပ်မြောင်း တံတားခုံပေါ်မှာ လက်နှစ်ဖက်ဖြင့် ဒူးကို သိုင်းယှက်ပြီး မြူဝေ့ဆိုင်းသော မျက်လုံးအစုံဖြင့် ရီဝေငေးမောစွာ ထိုင်နေမည်လား။
သည်လို အဝေးမြို့တစ်မြို့ဆီ အပြီးအပိုင် ထွက်ခွာသွားတော့မည့် အချိန်တွင် လိင်မတူသည့် မိန်းမသား တစ်ဦးဦးအား အားရပါးရ ပွေ့ဖက် နှုတ်ဆက်လိုက်ရလျှင် ဘယ်လောက် ကောင်းမည်နည်း။ အဲသည့် မြင်ကွင်းကလေးဟာ သိပ်ကို အနုပညာ ဆန်သွဦးလိမ့်မည်။ အို ... လိင်မတူတဲ့ မိန်းမ တစ်ယောက်ယောက်။ ကျွန်တော် သတိရပြီ။ လိင်မတူတဲ့မိန်းမ တစ်ယောက်ယောက်။ ကျွန်တော် တစ်ခါတုန်းက ရောက်ဖြစ်ခဲ့ဖူးသော အိမ်ကလေးကိုသွားပြီး သတိရသည်။
အဲသည်မှာ တစ်စုံတစ်ယောက်က ကျွန်တော့်ကို အဆင်သင့် စောင့်မျှော်နေနိုင်သည်။ ဟိုတစ်ခါတုန်းက သူမ မဟုတ်ခဲ့လျှင် အခြား တစ်ယောက်ယောက်ပေါ့။ တစ်ယောက်ယောက်တော့ တစ်ယောက်ယောက်ပေါ့။ ကိုဆွေးမောင်၊ ကိုကျောက်ခဲ၊ ဌေးရဲ့ ချစ်သူ စတဲ့ သူတို့ အပြင် ကျွန်တော့်မှာ လိင်မတူသည့် မိန်းမသား တစ်ယောက်လည်း မိတ်ဆွေ ရှိခဲ့ဖူးကြောင်း၊ ပြန်အမှတ်ရမိတော့ ပျော်ရွှင်သလို ခံစားလိုက်ရသည်။
အဲသည် အိမ်ကလေးဆီ ကျွန်တော် သွားမည်။ အဲသည်မှာ တွေ့ရမည့် တစ်ယောက်ယောက်။ တစ်ခါမျှ မတွေ့ကြုံ မသိကျွမ်းဖူးသော်လည်း သူမက ကျွန်တော့်ဆီမှ မိတ်ဆွေဖြစ်မှုကို ဝမ်းသာကြည်နူးစွာ လက်ခံမည်။ ကျွန်တော့်ရင်ထဲက ဝမ်းနည်းကြေကွဲမှုတွေကို သူမက မျှယူသွားလိမ့်မည်။ သူမကိုပဲ ကျွန်တော် နှုတ်ဆက်စကား ပြောရမည်။ ကျွန်တော့် တစ်ကိုယ်လုံး တင်းမာကိုက်ခဲနေသည့် စိတ်ဆန္ဒတွေ အာရုံကြောတွေ ပြေလျော့သွားလိမ့်မည်။ သူမသည် သည်မြို့ကလေးမှ ကျွန်တော်၏ တစ်ဦးတည်းသော မိတ်ဆွေအဖြစ် တိုင်တည် သစ္စာပြုခဲ့မည်။ ကျွန်တော့် ဘဝ၏ အထီးကျန်ဆန်မှုတွေကို သူမအား ရင်ဖွင့်ပြခဲ့မည်။
လမ်းကျဉ်းကလေး တစ်ခုထဲ ကျွန်တော် ချိုးဝင်လိုက်သည်။
ကျွန်တော့် ခြေလှမ်းတွေ တုံ့ဆိုင်းသွားသည်။ သည်နေ့ည ထွက်မည့် ရထားနှင့် ကျွန်တော် ခရီးသွားရမှာပဲ။ ဟိုမှာ အမေနှင့် အဖေတို့ စောင့်မျှော်နေကြမည်။ ဆယ်နှစ်ကျော် ကြာသည်အထိ ပြန်မလာသည့် သားတစ်ယောက်ကို သူတို့ စောင့်မျှော်နေကြလိမ့်မည်။ ကျွန်တော် ပြန်လာနိုင်ဖို့ သူတို့ အသေအချာ စီစဉ်ပြီးကြပြီ။ သည်နေ့ ညရထားဖြင့် လိုက်လာခဲ့မည့်အကြောင်း ကျွန်တော် ကိုယ်တိုင် သံကြိုးရိုက်ပြီးပြီး၊ ပြီးတော့ ဟိုမှာ တစ်စုံတစ်ယောက်။ ကျွန်တော့် ဇနီးလောင်းပေါ့လေ။ ကျွန်တော် ပြန်ရောက်လာမည့် နောက်တစ်ရက် ညမှာပဲ စေ့စပ်ပွဲကလေး ကျင်းပဖို့ နှစ်ဖက်မိဘတွေ အစုံအလင်နှင့် ကျွန်တော့်ကို စောင့်မျှော်နေကြလိမ့်မည်။
အချိန်ရပါသေးသည်။ ကျွန်တော် ရှေ့ဆက်လှမ်းခဲ့သည်။ ဟိုတစ်ညတုန်းက ရောက်ခဲ့ရသည့် အိမ်ကလေးဆီကိုပဲ အလင်းရောင် မှုန်ဝါးဝါးအောက်တွင် လူတစ်ယောက်နှင့် ရပ်ပြီး ငါးမိနစ်မျှ စကားပြောခဲ့ရသေးသည်။ ပြီးတော့ သွပ်မိုးအိမ် တစ်လုံး၏ အပေါ်ထပ် လှေကားအတိုင်း တက်ခဲ့သည်။ “အပေါ်ထပ် ညာဘက် အစွန်ဆုံး အခန်း ... အပေါ်ထပ် ညာဘက်အစွန်ဆုံး အခန်း”။ ဟိုလူပြောလိုက်သော စကားလုံးများကို ပြန်ရွတ်ရင်း အခန်းရှေ့ ရောက်လာသည်။ တံခါးပေါက်ကို တွန်းဖွင့်လိုက်သည်။
သူ၏ ရင်ခွင်ထဲမှာ ငိုရှိုက်နေဆဲ ကျွန်တော်စီးနင်းလိုက်ပါမည့် ရထားဟာ အဝေးကို ထွက်သွားခဲ့ပြီ။
--------
ပိုင်စိုးဝေ
မိုးဝေ၊ ဒီဇင်ဘာ၊ ၁၉၈၇။
